तुळजापूर (प्रतिनिधी)- श्री तुळजाभवानी मंदिर परिसरात उभारण्यात येणाऱ्या सुविधा व विकास कामांदरम्यान झालेल्या ऐतिहासिक मूर्तीच्या तोडफोडीबाबत महाविकास आघाडी व घटक पक्षांनी तीव्र नाराजी व्यक्त केली असून, जबाबदारांवर कठोर कारवाईची मागणी करत तुळजापूर पोलिस ठाण्यात तक्रार दाखल केली आहे.
महाविकास आघाडीच्यावतीने देण्यात आलेल्या निवेदनात म्हटले आहे की, राज्य शासनाच्या मंजूरीने तुळजाभवानी मंदिर विकास आराखड्यातून सुरू असलेल्या कामांमध्ये मंदिर परिसरातील ऐतिहासिक मूर्तीची तोडफोड करण्यात आली आहे. या प्रकारामुळे हिंदू समाजाच्या भावना दुखावल्या असून, हा प्रकार नियोजित आणि दुर्लक्षपूर्वक करण्यात आल्याचा आरोप करण्यात आला आहे.
या प्रकाराला जबाबदार असलेल्या राज्य पुरातत्व विभाग, मंदिर संस्थान, संबंधित ठेकेदार व जे दोषी असतील त्यांच्यावर तत्काळ गुन्हा दाखल करावा, अशी मागणी करण्यात आली आहे. जर कारवाई न झाल्यास तीव्र जनआंदोलन छेडण्याचा इशाराही यावेळी देण्यात आला आहे. दुसऱ्या पत्रातही हेच मुद्दे अधोरेखित करण्यात आले असून, या घटनेमुळे सामाजिक तेढ निर्माण होण्याची शक्यता असून प्रशासनाने तत्काळ लक्ष घालून कारवाई करावी, अशी स्पष्ट भूमिका मांडण्यात आली आहे.
या निवेदनावर धीरज पाटील, ऋषिकेश मगर, श्याम पवार, अमोल कुतवळ, सुधीर कदम, दीपक राज लोंढे, अमर चोपदार, उदय श्यामराज, कुलदीप लोंढे, राहुल खपले, अनमोल साळुंखे, नागनाथ भांजी यांसह महाविकास आघाडीच्या विविध पदाधिकाऱ्यांच्या स्वाक्षऱ्या आहेत.