उमरगा (प्रतिनिधी)- आयकर माफीची सवलत मिळवून देण्यासह कारवाईची भीती दाखवून एका कंपनी मॅनेजरची 19.30 लाखांची फसवणूक केल्याचा प्रकार उमरगा शहरात उघडकीस आला आहे. ही घटना 26 डिसेंबर 2024 ते 2 एप्रिल 2025 दरम्यान घडली आहे. मॅनेजरने दिलेल्या तक्रारीवरून तिघांविरुद्ध पोलिस ठाण्यात गुन्हा दाखल करण्यात आला आहे.
शहरातील मलंग प्लॉट एकोंडी रोड भागात पत्नीच्या नावे सविता सॉफ्टवेअर (ओपीसी) प्रायव्हेट लिमिटेड कंपनी असून मुरलीधर भाऊराव भोसले मॅनेजर म्हणून कार्यरत आहेत. स्वतः एका खासगी लि. कंपनीचे अधिकारी आणि आयकर अधिकारी असल्याचे सांगितले. तसे भासवून (बी. डी. ई. मोबाइल 8655649527), भगीरथी, विष्णू गुर्जर, शाखा व्यवस्थापक आदित्य खंडेलवाल (आयकर अधिकारी) यांनी कथितरित्या टेक्नॉलॉजिस्ट प्रायव्हेट लिमिटेड, जयपूर येथील कंपनीचे असल्याचे सांगून मॅनेजर मुरलीधर भोसले यांना ‘कंपनीला आयकर माफी सवलत मिळवून देण्याचे आमिष दाखवले. ही सवलत मिळवली नाही, तर आयकर विभाग त्यांच्या कंपनीवर कारवाई करणार व कंपनी ब्लॅक लिस्टमध्ये जाईल, अशी भीती दाखवली.
आयकर माफीचे प्रमाणपत्र मिळवून देण्यासाठी ‘कन्सल्टन्सी फीस”म्हणून भोसले यांच्याकडून एसबीआयच्या उमरगा शाखेतील खात्यावरून 19 लाख 30 हजार 664 रुपये उकळले. पैसे भरून बराच काळ उलटूनही आयकर माफीचे प्रमाणपत्र न मिळाल्याने व दिलेले पैसेही परत न मिळाल्याने फसवणूक झाल्याचे मुरलीधर भोसले यांच्या लक्षात आले. भोसले यांनी शुक्रवारी (16) उमरगा पोलिस ठाण्यात भगीरथी, विष्णू गुर्जर, आदित्य खंडेलवाल यांच्याविरुद्ध तक्रार दाखल केली असून पोलिसांनी आरोपींविरुद्ध भारतीय न्यायसंहिता कलम अन्वये गुन्हा नोंदवला आहे.