धाराशिव: 'संविधान दिन अमृत महोत्सव' निमित्त डॉ. बाबासाहेब आंबेडकर मराठवाडा विद्यापीठ उपपरिसर येथे भौतिकशास्त्र विभाग व राष्ट्रीय सेवा योजना यांच्या संयुक्त विद्यमाने संचालक डॉ. पी. पी. दिक्षित यांच्या मार्गदर्शनाखाली एकदिवसीय कार्यशाळेचे आयोजन करण्यात आले.
कार्यशाळेच्या उदघाटन सत्राच्या अध्यक्षस्थानी प्रा. डॉ. जी. डी. कोकणे, तर डॉ. रत्नाकर मस्के हे प्रमुख वक्ते म्हणून उपस्थित होते. अध्यक्षीय भाषणात डॉ.कोकणे यांनी संविधानाच्या योग्य अंमलबजावणीच्या माध्यमातून देशाचा आर्थिक, सामाजिक, सांस्कृतिक विकास गुणवत्तापूर्ण होईल असे मत व्यक्त केले. संविधानविषयी प्रत्येक नागरिकाला आस्था असणे आवश्यक आहे. नागरीकांंनी मुलभूत अधिकारा सोबत कर्तव्याबाबतीत जागरूकता दाखविली पाहिजे. संविधान विषयक जागृती निर्माण करण्याकरिता अशा कार्यशाळेंचे अधिक आयोजन व्हावे अशी अपेक्षा व्यक्त केली. डॉ. मस्के यांनी स्वातंत्र्य आणि स्वैराचार यावर प्रकाश टाकून विद्यार्थ्यांना मार्गदर्शन केले. विद्यार्थ्यांनी कठोर परिश्रमातून विद्यार्जन करावे. ज्ञानाचा उपयोग समाजात सकारात्मक बदल घडविण्यासाठी करावा, असे प्रतिपादन त्यांनी केले.
दुसऱ्या सत्रात प्रा. परिवर्तन जगताप यांनी भारतीय संविधानाविषयी मार्गदर्शन केले. प्रा.जगताप यांनी मूलभूत हक्क आणि राज्यधोरणाची मार्गदर्शक तत्वे यांवर प्रकाश टाकून मतदानाचे महत्व अधोरेखित केले. कार्यशाळेचे प्रास्ताविक राष्ट्रीय सेवा योजना कार्यक्रमाधिकारी डॉ. एम. के. पाटील यांनी तर आभार प्रदर्शन राष्ट्रीय सेवा योजना कार्यक्रमाधिकारी डॉ. आर. एम. खोब्रागडे यांनी केले. सूत्रसंचालन कु. ऋतुजा लबडे यांनी केले. सदर कार्यशाळेस विद्यार्थी, कर्मचारी उपस्थित होते.