भूम (प्रतिनिधी)- तालुक्यातील मौजे चिंचपूर ढगे येथे 30 जुलै रोजी कृषी विभागामार्फत 'नानाजी देशमुख कृषी संजीवनी प्रकल्प (पोकरा) टप्पा 2' अंतर्गत शेतकऱ्यांसाठी विशेष 'शेतीशाळा' आयोजित करण्यात आली होती. या शेतीशाळेत परिसरातील शेतकरी आणि महिला बचत गटांच्या सदस्यांनी मोठ्या संख्येने उपस्थिती लावली होती.
सोयाबीन पीक व सेंद्रिय शेतीवर भर
कार्यक्रमात मुख्य मार्गदर्शक म्हणून उपस्थित असलेले उपविभागीय कृषी अधिकारी श्री. महादेव आसलकर यांनी सोयाबीन पिकाच्या एकात्मिक कीड नियंत्रण व एकात्मिक अन्नद्रव्य व्यवस्थापनाबाबत शेतकऱ्यांना अत्यंत सखोल व तांत्रिक मार्गदर्शन केले. बदलत्या हवामानात पिकांचे नुकसान टाळण्यासाठी कृषी विद्यापीठाने शिफारस केलेल्या पद्धतींचा अवलंब करण्याचे आवाहन त्यांनी केले. तसेच, सेंद्रिय शेतीचे महत्त्व पटवून देत त्यांनी दशपर्णी अर्क, जीवामृत आणि बीजामृत घरच्या घरी कसे तयार करावे आणि त्याचा पिकांवर प्रभावी वापर कसा करावा, याचे प्रात्यक्षिकांसह मार्गदर्शन केले.
फवारणी करताना घ्यावयाची काळजी व कीड ओळख
मंडळ कृषी अधिकारी श्री. देविदास चौधरी यांनी उपस्थित शेतकऱ्यांना शेतात कीटकनाशकांची फवारणी करताना स्वतःच्या आरोग्याची कशी काळजी घ्यावी, याबाबत सविस्तर माहिती दिली. फवारणी किटचा सुरक्षित वापर आणि योग्य फवारणी तंत्राबाबत त्यांनी मार्गदर्शन केले. याचसोबत, सोयाबीन पिकावर पडणाऱ्या विविध किडींची ओळख कशी करावी, याचे प्रशिक्षणही शेतकऱ्यांना देण्यात आले.
मान्यवरांची उपस्थिती
या शेतीशाळेला पंचायत समिती भूमचे सभापती श्री. विशाल ढगे यांची प्रमुख उपस्थिती होती. याशिवाय भूमच्या मंडळ कृषी अधिकारी श्रीमती नेहा भंडलकर, उप कृषी अधिकारी श्री. नवनाथ गिरी, सहाय्यक कृषी अधिकारी श्री. लक्ष्मीकांत लोणकर, श्री. अक्षयकुमार गायकवाड, समूह सहायक संतोष भारगंडे आदी अधिकारी व कर्मचारी उपस्थित होते. या नाविन्यपूर्ण शेतीशाळेचा लाभ चिंचपूर ढगे येथील महिला बचत गटाच्या सदस्य महिला, प्रगतीशील शेतकरी व ग्रामस्थांनी मोठ्या संख्येने घेतला. कृषी विभागाच्या या उपक्रमाचे सर्व स्तरांतून कौतुक होत आहे.