तुळजापूर (प्रतिनिधी)- तुळजापूर येथील श्री तुळजाभवानी मंदिर संस्थानमध्ये गेल्या दोन ते तीन वर्षांपासून सुरू असलेल्या व्हीआयपी पास वाटपाच्या कथित गैरप्रकारांबाबत आता गंभीर प्रश्न उपस्थित करण्यात आले आहेत. या संदर्भात अखिल भारतीय भ्रष्टाचार निर्मूलन संघर्ष समितीच्या वतीने शासन व प्रशासनाला निवेदन सादर करण्यात आले आहे.
निवेदनानुसार, मंदिरात व्हीआयपी पास देताना नियमांची पायमल्ली होत असल्याचा आरोप करण्यात आला आहे. विशेष म्हणजे, काही व्हीआयपी नसलेल्या विशिष्ट व्यक्तींनाच प्राधान्य देत व्हीआयपी पास वाटप केले जात असल्याचे नमूद करण्यात आले आहे. त्यामुळे सर्वसामान्य भाविकांमध्ये नाराजीचे वातावरण निर्माण झाले आहे. व्हीआयपी पास वाटपात बाह्य व्यक्तींचा मोठा हात असल्याचे दिसून येत आहे. संघटनेच्या म्हणण्यानुसार, मंदिर संस्थानने शासनाने ठरवलेल्या नियमांनुसारच व्हीआयपी पास वाटप करणे आवश्यक आहे. त्यामुळे व्हीआयपी पाससंदर्भातील संपूर्ण प्रक्रिया पारदर्शक व नियमबद्ध करण्याची मागणी करण्यात आली आहे. तसेच, निवेदनात पुढे नमूद करण्यात आले आहे की, मंदिरातील काही अधिकाऱ्यांकडून व्हीआयपी पास वाटपात अनियमितता होत असल्याचे दिसून येत आहे. याशिवाय, आतापर्यंत झालेल्या व्हीआयपी पास वाटपाची सखोल चौकशी करून, दोषी आढळणाऱ्यांवर कायद्याच्या चौकटीत राहून कारवाई करावी, अशी मागणी करण्यात आली आहे.
महत्त्वाचे म्हणजे, जर 15 दिवसांच्या आत या प्रकरणात कोणतीही ठोस कारवाई झाली नाही, तर संबंधित संघटनेच्या वतीने मंदिर कार्यालयासमोर तीव्र आंदोलन छेडण्याचा इशाराही देण्यात आला आहे. त्यामुळे प्रशासनासमोर आता या प्रकरणात तातडीने निर्णय घेण्याचे आव्हान उभे ठाकले आहे. दरम्यान, या निवेदनाची दखल घेऊन जिल्हाधिकारी, तहसीलदार तसेच मंदिर संस्थान प्रशासनाने योग्य ती पावले उचलावीत, अशी अपेक्षा व्यक्त केली जात आहे. संपूर्ण प्रकरणाची निष्पक्ष चौकशी होऊन भाविकांना न्याय मिळेल का, याकडे सर्वांचे लक्ष लागले आहे.