धाराशिव (प्रतिनिधी)- परिवहन विभागाच्या निदर्शनास आले आहे की,अलीकडील काळात ड्रायव्हिंग लायसन्स,वाहन नोंदणी, ई-चलन इत्यादी सेवांशी संबंधित बनावट वेबसाइट्स,फसवे मोबाईल अॅप्स (APKs), तसेच मोबाइल SMS/WhatsApp द्वारे पाठविल्या जाणाऱ्या खोट्या लिंक्स मोठ्या प्रमाणात नागरिकांना फसवत आहेत.त्यामुळे वाहन चालक आणि मालकांची आर्थिक फसवणूक,वैयक्तिक माहितीची चोरी तसेच ओळखीचा गैरवापर होत असल्याचे आढळून आले आहे.
या पार्श्वभूमीवर सर्व वाहन चालक व वाहन मालक यांनी केवळ परिवहन विभागाच्या अधिकृत शासकीय संकेतस्थळांचाच वापर करावा,असे आवाहन करण्यात आले आहे.
अधिकृत संकेतस्थळे खालीलप्रमाणे आहेत.
1. वाहन नोंदणी सेवा (VAHAN) – https://vahan.parivahan.gov.in
2. ड्रायव्हिंग लायसन्स सेवा (SARATHI) – https://sarathi.parivahan.gov.in
3. परिवहन सेवा – https://www.parivahan.gov.in
4. ई-चलन –पोर्टल https://echallan.parivahan.gov.in
ही सर्व संकेतस्थळे “.gov.in” ने समाप्त होतात.“.com”, “.online”, “site”, “*.in” अशा डोमेनवरील कोणत्याही वेबसाइटवर प्रवेश करू नये,असे स्पष्ट करण्यात आले आहे.
फसवणूक करणाऱ्यांकडून येणारे संदेश बहुधा पुढीलप्रमाणे असतात."आपल्या वाहनाचे चलन बाकी असून त्वरित दंड भरण्याची धमकी देऊन अनधिकृत लिंक पाठविण्यात येते.DL (वाहन चालविण्याचा परवाना) सस्पेंड होणार आहे,त्वरित तपासणी करा.
परिवहन विभाग अथवा RTO कार्यालयाकडून WhatsApp द्वारे कधीही पेमेंट लिंक पाठविली जात नाही,याची विशेष नोंद घ्यावी.तसेच “RTO Services.apk”, “rmParivahan_Update.apk”, “eChallan_Pay.apk” ही अनधिकृत APK फाइल्स डाउनलोड करू नयेत. अशा अॅप्सद्वारे OTP, बँकिंग माहिती आणि मोबाईलमधील संवेदनशील डेटा चोरी होण्याची शक्यता असते.नागरिकांनी कोणताही संशयास्पद संदेश किंवा लिंक प्राप्त झाल्यास त्वरित खालील ठिकाणी तक्रार करावी :
राष्ट्रीय सायबर गुन्हे पोर्टल – https://www.cybercrime.gov.in
सायबर फसवणूक हेल्पलाइन – 1930 किंवा जवळचे जिल्हा सायबर पोलीस स्टेशन येथे तक्रार करावी.असे आवाहन उप प्रादेशिक परिवहन अधिकारी हर्षल डाके यांनी केले आहे