भूम (प्रतिनिधी)- अवैधरित्या कत्तलीसाठी जनावरांची तस्करी गोरक्षकांच्या मदतीने दि. 13 जुलै रोजी सकाळी भूम- पार्डी रोडवर पकडली आहेत . यासंदर्भात अवैद्य कत्तलीसाठी घेऊन जाणाऱ्यावर गुन्हा नोंद करण्यात आला आहे.
अधिक माहिती अशी की, रविवारी सकाळी साडेआठ वाजण्याच्या सुमारास भूम शहरात मानद पशू कल्याण अधिकारी विराज आनंद सोले (वय 25 रा. संतोष नगर ,कात्रज पुणे ) व त्यांच्या सहकाऱ्यांनी पार्डी रोडवरील श्रावणी हॉटेल जवळ जनावरांची अवैध वाहतूक करणारी दोन वाहने पकडली. त्यांनी ही माहिती तात्काळ भूम पोलिसांना दिली. पोलिसांनी घटनास्थळी धाव घेत कारवाई करत दोन्ही वाहने ताब्यात घेतली. या वाहनांमध्ये एकूण 20 जनावरे आढळून आली आहेत. आयशर टेम्पोमध्ये 15 जनावरे व चार चाकी पिकप मध्ये 5 जनावरे दोन्ही मिळून 19 मोठ्या गाई व एक कालवड आहे. ही सर्व जनावरे बेकायदेशीरपणे वाहून कत्तलीसाठी नेत असल्याचे प्राथमिक तपासात उघड झाले आहे.
पोलिसांनी दोन्ही वाहने आणि जनावरे ताब्यात घेऊन भूम पोलीस ठाण्यात जमा केली. या प्रकरणाचा पंचनामा करून पुढील तपास पोलीस उपनिरीक्षक संजय झराड व बीट अमंलदार शबाना मुल्ला हे करत आहे.