धाराशिव (प्रतिनिधी) - शहरातील ठाकरे नगर नवरात्र महोत्सव मंडळाच्यावतीने आयोजित केलेल्या खास महिला तीर्थक्षेत्र दर्शन सहलीस आमदार कैलास पाटील यांनी हिरवा कंदील दाखविला. त्यानंतर ही सहल रवाना झाली.
धाराशिव शहरातील ठाकरे नगर नवरात्र महोत्सव मंडळाच्या आधारस्तंभ श्यामलताई साळुंके व मंडळाचे मार्गदर्शक प्रशांत (बापू) साळुंके यांच्या माध्यमातून या सहलीचे आयोजन करण्यात आले आहे.
ठाकरे नगर नवरात्र महोत्सव मंडळाच्या वतीने दरवर्षी महिलांसाठी विविध कार्यक्रम घेण्यात येतात. विशेषत: नवरात्र महोत्सवात धार्मिक, सांस्कृतिक व सामाजिक प्रबोधनाचे कार्य हे मंडळ करत आहे. विशेष म्हणजे या नवरात्र महोत्सव मंडळाच्या कार्यकारिणीत सर्व महिलांचा समावेश असतो. या महिलांना तीर्थक्षेत्र दर्शनाची संधी मिळावी यासाठी दि. 11 मे रोजी पहाटे 3 वाजण्याच्या सुमारास ठाकरे नगर येथून ही तीर्थक्षेत्र दर्शन सहल मार्गस्थ झाली. या दर्शन सहलीसाठी दोन बसची व्यवस्था करण्यात आली असून मंडळातील एकूण 92 महिला यात सहभागी झाल्या आहेत. दोन दिवसांची ही दर्शन सहल तीर्थक्षेत्र आदमापूर येथील संत बाळू मामा देवस्थान, साडेतीन शक्तिपीठांपैकी पूर्णपीठ असलेली कोल्हापूरची श्री महालक्ष्मी, क्ष्री क्षेत्र ज्योतिबा, नृसिंहवाडी देवस्थान आदी ठिकाणी देव दर्शन करून ही सहल माघारी येणार असल्याचे मंडळाचे मार्गदर्शक प्रशांत साळुंके यांनी सांगितले.