धाराशिव (प्रतिनिधी)- सोलापूर, धाराशिव जिल्ह्यात घरफोड्या व चोऱ्या करून धुमाकुळ घालणाऱ्या अट्टल गुन्हेगाराला धाराशिव स्थानिक गुन्हा शाखेने जेरबंद केले आहे.
सदरचा गुन्हा करताना आरोपी हे सीसीटीव्ही मध्ये कैद झालेले होते. सर्व प्रसारमाध्यमे तसेच व्हॉटसअप ग्रुपवर त्यांच्या चोरी करतानाचा व्हिडीओ व्हायरल झालेल्या होत्या. त्यामुळे लोकांच्या मनात भितीचे वातावरण निर्माण झालेले होते. सदरच गुन्ह्याचे गांभीर्य लक्षात घेवून स्थानिक गुन्हेशाखेचे पथक गुन्हा उघडकीस आणणे करीता रवाना झाले होते. पथकास गुप्त बातमीदारा मार्फत माहिती मिळाली की, पोलीस ठाणे बेंबळी व इतर ठिकाणी घरफोड्या व चोऱ्या करणारा सराईत गून्हेगार अक्षय बाळू शिंदे, रा. सुंभा ह.मु. लासोना ता. जि. धाराशिव शिवार यांने व त्याच्या इतर साथीदार यांनी मिळून केल्या असल्याची बातमी मिळाली. परंतु सदरचा आरोपी हा डोगंर भागात, रानामाळात, निर्मष्य ठिकाणी राहणारा व वेळोवेळी राहते ठिकाण बदलणारा असल्याने स्थानिक गुन्हे शाखेच्या पथकाने त्याच्या सध्या राहत्या ठिकाणाची माहिती काढून सांपळा रचून त्यास लासोना, ता. जि. धाराशिव शिवारातील साठवण तलावाचे पाळुचे बाजूस केलेल्या पालीतुन दि. 10.08.2024 ताब्यात घेतले.
घरफोड्यासह मोटारसायकल चोरी
गुन्ह्याच्या अनुषंगाने विचारपुस केली असता त्याने व त्याच्या इतर 4 साथीदार यांच्या मदतीने पाडोळी तसेच इतर 7 ठिकाणी पळसप, कोल्हेगाव, कोंड, राजुरी, धाराशिव शहर येथे घरफोडी केलेल्या आहेत. तसेच त्याने 5 मोटरसायकली चोरी केल्याची कबुली दिली. सदर घरफोडीच्या गुन्ह्यातील त्याच्या वाटणीस आलेले 5 तोळे सोन्याचे दागिने त्याच्या ताब्यातुन जप्त केले. तसेच धाराशिव जिल्ह्यातील 03 चोरी केलेल्या मोटरसायकल व सोलापूर जिल्हृयातील 2 मोटरसायकल असे एकुण 5 मोटरसायकली त्याच्या ताब्यातुन जप्त केल्या. तसेच पथकाने नमुद आरोपीकडून धाराशिव जिल्ह्यातील 8 घर फोडीचे केलेले गुन्हे व 05 मोटरसायकल चोरी केलेल्या गुन्ह्यातील एकुण 3 लाख 6 हजार रूपये किंमतीचा मुद्देमाल हस्तगत करण्यात आला. नमुद आरोपीस पुढील कार्यवाही कामी ढोकी पोलीस ठाणे यांच्या ताब्यात दिले.
सदरची कामगीरी ही जिल्हा पोलीस अधीक्षक अतुल कुलकर्णी, अप्पर पोलीस अधीक्षक गौहर हसन यांच्या मार्गदर्शनाखाली गुन्हे शाखेचे पोलीस निरीक्षक वासुदेव मोरे, सपोनि अमोल मोरे, सचिन खटके, पोलीस हावलदार विनोद जानराव, हुसेन सय्यद, समाधान वाघमारे, पोलीस नाईक नितीन जाधवर, बबन जाधवर, रवींद्र आरसेवाड, चालक महेबुब अरब, चालक प्रशांत किवंडे, प्रकाश बोईनवाड, यांच्या पथकाने ही कारवाई केली आहे.