उमरगा (प्रतिनिधी)- मुख्यमंत्री लाडकी बहीण योजनेची जनजागृती करणे, पात्रतेबाबत अनेक अटी शिथील झाले असून त्याबाबत सर्व सामान्य कुटुंबातील महिलांना माहिती द्यावी. राखी पौर्णिमेंपर्यंत तालुक्यांतील किमान 50 टक्के महिलांना या योजनेचा लाभ मिळवून देणेसाठी प्रशासनाने युद्धपातळीवर काम करावे. योजनेची योग्य अंमलबजावणी व्हावी यासाठी या योजनेचे पात्र लाभार्थी घरोघरी जाऊन शोधण्याचे आवाहन आमदार ज्ञानराज चौगुले यांनी दिल्या.

मुख्यमंत्री लाडकी बहीण योजनेची व्याप्ती वाढवणे व जास्तीत जास्त लाभार्थी शोधून काढले, या योजनेपासून कोणीही वंचित राहणार नाही यासाठीआमदार ज्ञानराज चौगुले यांच्या अध्यक्षतेखाली व युवानेते किरण गायकवाड, उपविभागीय अधिकारी गणेश पवार यांच्या उपस्थितीत शुक्रवारी (दि.19) आढावा बैठक संपन्न झाली. यावेळी आमदार चौगुले यांनी प्रशासकीय यंत्रणेने उमरगा व लोहारा तालुक्यातील प्रत्येक गावात जनजागृती करावी. घरोघरी जाऊन जनजागृती करावी व योजनेची परिपूर्ण माहिती प्रत्येक कुटुंबाला दयावी. आधार कार्ड व बँक खाते क्रमांकाची अचूक नोंद घ्यावी. जेणेकरून महिलांना कुठल्याही अडचणींचा सामना करावा लागणार नाही. त्रुटी आढळल्यास कागदपत्रांची पूर्तता करून घेवून त्या प्रस्तावांना मंजुरी देण्यात यावी, एकही अर्ज नामंजूर होणार नाही याची दक्षता घेण्याची सुचना दिली. या बैठकीसाठी तहसिलदार गोविंद येरमे, तालुकाप्रमुख बळीराम सुरवसे, नायब तहसीलदार रतन काजळे, न.प.चे तुळशीदास वराडे, शिवसेना शहरप्रमुख योगेश तपासाळे, विधानसभा संघटक शरद पवार, विद्यार्थी सेना तालुकाप्रमुख संदीप चौगुले, तालुक्यातील मंडळ अधिकारी, तलाठी व कर्मचारी उपस्थित होते.

 
Top