धाराशिव (प्रतिनिधी)- नागपूर येथील एम्सचे तज्ञ आता दर पंधरा दिवसाला धाराशिवच्या शासकीय वैद्यकीय महाविद्यालयात शिकणाऱ्या विद्यार्थ्यांसाठी लेक्चर घेणार आहे. त्याचबरोबर काही सुपरस्पेशालिस्ट डॉक्टर दररोज एक तास त्यांचा अमूल्य वेळ रुग्ण उपचारासाठी देणार आहेत. एम्स आणि आपले शासकीय वैद्यकीय महाविद्यालय दोन्ही संस्थांमधील सामंजस्य कराराच्या मसुद्याला राज्य शासनानेही आता मंजुरी दिली असल्याची माहिती आमदार राणाजगजितसिंह पाटील यांनी दिली.
एम्स आणि धाराशिव येथील शासकीय वैद्यकीय महाविद्यालय यांच्यातील सामंजस्य कराराच्या अनुषंगाने त्यांनी आढावा घेतला. नागपूर येथील एम्सच्या सहकार्यातून धाराशिव येथील शासकीय वैद्यकीय महाविद्यालयामध्ये ऑनलाईन वर्ग घेतले जात आहेत. या माध्यमातून येथील विद्यार्थ्यांना एम्समधील तज्ञ डॉक्टरांकडून थेट मार्गदर्शन, अद्ययावत माहिती आणि दर्जेदार वैद्यकीय शिक्षण लाभणार आहे. कर्मचाऱ्यांनाही एम्ससारख्या नामांकित संस्थेत कशाप्रकारे रुग्णसेवा आणि व्यवस्थापन चालते याचे व्यावहारिक प्रशिक्षणही आता उपलब्ध करून देण्यात येणार आहे. त्याचबरोबर एम्समधील काही सुपरस्पेशालिस्ट डॉक्टर दररोज त्यांचा एक तास अमूल्य वेळ रुग्ण उपचारासाठी देणार आहेत. काही गुंतागुंतीच्या शस्त्रक्रिया करण्यासाठी या मान्यवर सुपरस्पेशालिस्ट डॉक्टर मंडळींचे मोठे सहकार्य लाभणार आहे. एम्सच्या धर्तीवर शासकीय वैद्यकीय महाविद्यालय धाराशिव येथील अभ्यासक्रम असायला हवा यासाठीही आपला पाठपुरावा सुरू असल्याचे आमदार राणाजगजितसिंह पाटील यांनी सांगितले आहे. यावेळी शासकीय वैद्यकीय महाविद्यालयाचे अधिष्ठाता डॉ. शैलेंद्रसिंह चौहान,जिल्हा शल्य चिकित्सक डॉ.चाकूरकर, जिल्हा आरोग्य अधिकारी डॉ. हरिदास उपस्थित होते.
सामंजस्य कराराच्या मसुद्याला शासन मान्यता
धाराशिव जिल्ह्यातील रुग्णांना दर्जेदार वैद्यकीय सोयी सुविधा उपलब्ध व्हाव्यात, तसेच शासकीय वैद्यकीय महाविद्यालयातील विद्यार्थ्यांना चांगल्या प्रतीचे अद्ययावत शिक्षण मिळावे. यासाठी नागपूर येथील एम्सच्या धर्तीवर शासकीय वैद्यकीय महाविद्यालयाच्या आधुनिकीकरणासाठी सामंजस्य करार करण्यात आला होता. त्याला जुलै महिन्यात महाराष्ट्र शासनाने अधिकृत मान्यता दिली आहे. आमदार राणाजगजितसिंह पाटील यांनी विधानसभेत उपस्थित केलेल्या प्रश्नाला उत्तर देताना वैद्यकीय शिक्षणमंत्री हसन मुश्रीफ यांनी सभागृहातच वरील माहिती जाहीर केली आहे. त्यामुळे या दोन्ही संस्थांमधील सामंजस्य कराराचा फायदा थेट विद्यार्थ्यांसह धाराशिव जिल्हा आणि परिसरातील रुग्णांनाही होणार असल्याचा विश्वास आमदार पाटील यांनी व्यक्त केला आहे.