भूम (प्रतिनिधी)- शंकरराव पाटील महाविद्यालय, भूम येथे आलम प्रभू यात्रा उत्सवाच्या निमित्ताने श्री तुळजाई दुर्ग प्रतिष्ठान, भूम तालुका यांच्या वतीने पूरग्रस्त व गरजू विद्यार्थ्यांना मोफत शैक्षणिक साहित्याचे वाटप करण्यात आले.
याप्रसंगी “आजचा युवक आणि छत्रपती शिवरायांचे कार्य” या विषयावर श्री तुळजाई दुर्ग प्रतिष्ठानचे सर्वेसर्वा, संकल्पक व संस्थापक माननीय शिवश्री विठ्ठल आण्णा बाराते यांनी प्रेरणादायी व्याख्यान दिले. त्यांनी युवकांनी छत्रपती शिवाजी महाराजांच्या विचारांचा आदर्श घेऊन समाजासाठी कार्य करावे, तसेच गडकिल्ल्यांचे संवर्धन करण्यासाठी पुढाकार घ्यावा, असे आवाहन केले.
कार्यक्रमात श्री तुळजाई दुर्ग प्रतिष्ठानतर्फे दिला जाणारा “श्री तुळजाई दुर्ग सामाजिक योद्धा पुरस्कार 2025” हा ह.भ.प. अरुण काळे महाराज यांना संस्थेचे पदाधिकारी व महाविद्यालयाचे प्राचार्य डॉ. संतोष शिंदे सर यांच्या हस्ते प्रदान करण्यात आला. यावेळी प्रा. काळे सर यांनी श्री तुळजाई दुर्ग प्रतिष्ठान तसेच विठ्ठल अण्णा बाराते यांच्या सामाजिक कार्याची सविस्तर ओळख करून दिली.
अध्यक्षीय समारोपात बोलताना प्राचार्य डॉ. संतोष शिंदे यांनी श्री तुळजाई दुर्ग प्रतिष्ठान व विठ्ठल अण्णा बाराते यांचे कार्य अतिशय अतुलनीय असल्याचे गौरवोद्गार काढत पुढील कार्यासाठी शुभेच्छा दिल्या. मनोगतात बोलताना विठ्ठल अण्णा बाराते यांनी निस्वार्थी, सुसंस्कारित, निर्व्यसनी व चारित्र्यसंपन्न युवक समाजात उभा राहावा, ही अपेक्षा व्यक्त केली. या कार्यक्रमास महाविद्यालयातील सर्व प्राध्यापक, विद्यार्थी तसेच श्री तुळजाई दुर्ग प्रतिष्ठानचे अध्यक्ष तेजस औताडे, अभिषेक सुरवसे, प्रशांत राजे शेळके, निलेश औताडे, अनिकेत आकरे, अभी कराळे, शुभम अंधारे, रामराजे कुंभार, यश भांगे आदी पदाधिकारी व शिलेदार उपस्थित होते. कार्यक्रमाचे सूत्रसंचालन प्रा. काळे यांनी विलोभनीय शब्दांत केले, तर महाविद्यालयाचे प्राचार्य डॉ. संतोष शिंदे यांनी उपस्थितांचे आभार मानले.