भूम (प्रतिनिधी)- भूम तालुक्यातील शंकरराव पाटील कनिष्ठ महाविद्यालयात नुकत्याच झालेल्या तालुकास्तरीय कबड्डी स्पर्धेला उत्साहवर्धक प्रतिसाद मिळाला. या स्पर्धेत विविध महाविद्यालयांच्या संघांनी सहभागी होत उत्तम खेळाचा परिचय करून दिला.
स्पर्धेत यजमान शंकरराव पाटील कनिष्ठ महाविद्यालयाच्या संघाने दमदार खेळ करत प्रथम क्रमांक पटकावला. अंतिम सामन्यात संघाने उत्कृष्ट बचाव आणि चढायांचा प्रभावी वापर करून प्रतिस्पर्ध्यांना मोठ्या फरकाने पराभूत केले. खेळाडूंच्या जिद्दीने, शिस्तबद्ध खेळाने व एकीच्या जोरावर संघाने विजेतेपद मिळवले.
स्पर्धेत विजयी ठरलेल्या संघातील विद्यार्थ्यांना पुढील जिल्हास्तरीय कबड्डी स्पर्धेसाठी शुभेच्छा देण्यात आल्या. यावेळी विद्यार्थ्यांच्या चेहऱ्यावर आनंद ओसंडून वाहत होता.
या प्रसंगी महाविद्यालयाचे प्राचार्य डॉ. संतोष शिंदे यांनी विद्यार्थ्यांचे अभिनंदन करत पुढील स्पर्धेतही संघ नक्कीच चमकदार कामगिरी करेल, असा विश्वास व्यक्त केला. तसेच पर्यवेक्षक राम सोळंके, प्रा. तानाजी बोराडे, प्रा. अनुराधा जगदाळे, क्रीडा शिक्षक महेश सुर्यवंशी यांनी विद्यार्थ्यांना मार्गदर्शन केले. कार्यक्रमास महाविद्यालयातील सर्व शिक्षक व शिक्षकेतर कर्मचारी उपस्थित होते. या यशामुळे शंकरराव पाटील कनिष्ठ महाविद्यालयाचा गौरव वाढला असून, जिल्हास्तरीय स्पर्धेतही उत्तम यश मिळावे, अशी अपेक्षा व्यक्त केली जात आहे.