धाराशिव (प्रतिनिधी) - लातूर येथे अखिल भारतीय छावा संघटनेचे पदाधिकारी विजय घाडगे यांनी राष्ट्रवादी काँग्रेसचे प्रदेशाध्यक्ष खासदार सुनील तटकरे यांच्याकडे एका निवेदनाद्वारे शेतकऱ्यांची कर्जमाफी करावी व कृषी मंत्री माणिकराव कोकाटे यांचा राजीनामा घ्यावा. अशी मागणी तटकरे यांच्याकडे केली होती.
त्याचा राग मनात धरून राष्ट्रवादी काँग्रेसचे पदाधिकारी यांनी विजय घाडगे यांना बेदम मारहाण केली. त्याच्या निषेधार्थ धाराशिव शहरात छावा संघटनेच्या कार्यकर्त्यांनी राष्ट्रवादी काँग्रेसचे सुनील तटकरे यांच्या स्वागतार्थ लावलेले बॅनर फाडून निषेध व्यक्त केला. तसेच छावाच्या कार्यकर्त्यांनी राष्ट्रवादी काँग्रेस कार्यालयासमोर आंदोलन करीत घेराव घातल्यामुळे तात्काळ पोलिसांची तुकडी दाखल झाली. त्यामुळे राष्ट्रवादी काँग्रेसच्या कार्यालयास पोलीस छावणीचे स्वरूप आले. दरम्यान तटकरे हे दुपारी या कार्यालयात आले. त्यांनी पत्रकार परिषद घेतली. त्यानंतर तटकरे कार्यालयाच्या बाहेर पडताच छावा संघटनेच्यावतीने राष्ट्रवादी काँग्रेसच्या निषेधाच्या घोषणा देवून निदर्शने केली.