तुळजापूर (प्रतिनिधी)- कायद्याच्या क्षेत्रात परिश्रम, चिकाटी आणि अभ्यासाच्या जोरावर यशाची नवी शिखरे गाठता येतात याचा प्रत्यय तुळजापूरच्या सुपुत्राने घडवून दिला आहे. मिनिस्ट्री ऑफ लॉ अँड जस्टीस, दिल्ली यांनी 15 सप्टेंबर 2025 रोजी काढलेल्या आदेशानुसार तुळजापूरचे सुपुत्र ॲड. नितीन सुरेश साळुंके यांची स्टँडिंग कौन्सिल फॉर युनियन ऑफ इंडिया (सरकारी वकील भारत सरकार) म्हणून नियुक्ती करण्यात आली आहे.
मूळचे तुळजापूरचे रहिवासी असलेले ॲड. नितिन साळुंके हे सध्या छत्रपती संभाजीनगर येथील उच्च न्यायालयात वकिली करतात. अल्पावधीतच त्यांनी न्यायालयीन कामकाजात आपली वेगळी ओळख निर्माण केली आहे. त्यांचे अभ्यासू व्यक्तिमत्व, कायद्यावरील सखोल अभ्यास, तर्कशुद्ध मांडणी आणि खंबीर भूमिकेमुळे केंद्र सरकारने त्यांना ही महत्त्वाची जबाबदारी दिली आहे. विशेष म्हणजे, ते या पदावर नियुक्त झालेले सर्वात कमी वयाचे एकमेव वकिल स्टँडिंग कौन्सिल आहेत.
तुळजापूर शहर, तालुका आणि संपूर्ण जिल्ह्यासाठी ही बाब अभिमानाची आहे. आता येणाऱ्या महत्त्वपूर्ण प्रकरणांत ते भारत सरकारची बाजू ठामपणे मांडतील, असा विश्वास व्यक्त होत आहे. त्यांच्या या यशाबद्दल वकिली क्षेत्रासह सामाजिक, शैक्षणिक व राजकीय क्षेत्रातून शुभेच्छांचा वर्षाव होत आहे. ॲड. नितीन साळुंके यांच्या या नियुक्तीने तरुण वकिलांसमोर प्रेरणादायी उदाहरण निर्माण केले असून तुळजापूरचा गौरव उंचावला आहे.
“तुळजापूरच्या सुपुत्राने अल्पावधीतच मोठा सन्मान मिळवला आहे. त्यांच्या यशामुळे संपूर्ण जिल्ह्याला अभिमान वाटतो.”
- माजी नगरसेवक विशाल रोचकरी, तुळजापूर