कळंब (प्रतिनिधी)- राष्ट्रीय विधी सेवा प्राधिकरण व महाराष्ट्र विधी सेवा प्राधिकरण यांचे निर्देशानुसार जिल्हा विधी सेवा प्राधिकरण धाराशिव यांचे मार्गदर्शनाखाली दि. 13 सप्टेंबर, रोजी अतिरिक्त जिल्हा व सत्र न्यायालय, कळंब या ठिकाणी राष्ट्रीय लोकअदालतीचे आयोजन करण्यात आले होते. सदरील लोकअदालतीमध्ये एकुण पाच पॅनल तयार करण्यात आलेले होते. त्या राष्ट्रीय लोकअदालतीमध्ये 887 प्रकरणाचा निपटारा तर 2 कोटी 61 लाख 71 हजार 628 रूपये इतक्या रकमेची तडजोड करण्यात आली आहे. अशी माहिती तालुका विधी सेवा समितीचे अध्यक्ष तथा जिल्हा न्यायाधीश-1 आर. के. राजेभोसले यांनी दिली आहे.
या पाच पॅनल मध्ये आर. के. राजेभोसले जिल्हा न्यायाधीश-1 यांनी पॅनल प्रमुख तर ॲड. ए. आर. शिंदे यांनी पॅनल पंच म्हणून कामकाज पाहिले. पी. आर. कुलकर्णी, दिवाणी न्यायाधीश व. स्तर यांनी पॅनल प्रमुख तर ॲड. ए. एम. लांडगे यांनी पॅनल पंच म्हणून कामकाज पाहिले. के. के. चौधरी, सह दिवाणी न्यायाधीश कनिष्ठ स्तर, यांनी पॅनल प्रमुख तर ॲड. ए. एस. लोमटे यांनी पॅनल पंच म्हणून कामकाज पाहिले. एन. एम. रेड्डी, 2 रे सह दिवाणी न्यायाधीश कनिष्ठ स्तर, यांनी पॅनल प्रमुख तर ॲड. एस. पी. गायकवाड यांनी पॅनल पंच म्हणून कामकाज पाहिले. तर ए. डी. जाधव 3 रे सह दिवाणी न्यायाधीश कनिष्ठ स्तर, यांनी पॅनल प्रमुख तर ॲड. डी. ए. कांबळे यांनी पॅनल पंच म्हणून कामकाज पाहिले.
तडजोडीचे प्रकरणे
सदरील लोकअदालतीमध्ये पाच पॅनलकडील ठेवण्यात आलेल्या एकुण 308 दिवाणी प्रकरणांपैकी 76 दिवाणी प्रकरणे तडजोडीने मिटविण्यात आली. सदरील प्रकरणामध्ये मोटार अपघात विमा क्लेमच्या 2 प्रकरणामध्ये रक्कम रुपये 97 लाख 65 हजार तर रक्कम वसुलीबाबतच्या दरखास्तीच्या एकुण 39 प्रकरणामध्ये 1 कोटी 39 लाख 75 हजार 641 रूपये आणि इतर 35 दिवाणी प्रकरणे तडजोडीने मिटविण्यात आली. तसेच विविध स्वरुपाच्या एकुण 219 फौजदारी प्रकरणांपैकी एन. आय. ॲक्ट 138 ची 2 प्रकरणे मिटविण्यात आली, ज्यामध्ये रक्कम रुपये 1 लाख 640 रूपये इतक्या रकमेची तडजोड झाली. तसेच कौटुंबिक हिंसाचार प्रकरणापैकी 1 प्रकरण तडजोडीने मिटविण्यात आले. तर गुन्हा कबुलीच्या एकुण 14 प्रकरणांपैकी 3 प्रकरणामध्ये रक्कम रुपये 3 हजार 600 रूपये इतकी दंडाची रक्कम वसुल करण्यात आली.
वसुली रक्कम
त्याचप्रमाणे सदरील लोकअदालतीच्या दिवशी विविध बँका, ग्रामपंचायती, नगर परिषद, पतसंस्था अशा इतर कार्यालयांमार्फत एकुण 2446 दाखलपूर्व (प्री-लिटीगेशन) प्रकरणे सादर करण्यात आलेली होती. त्यापैकी बँकेच्या एकुण 10 दाखलपूर्व (प्री-लिटीगेशन) प्रकरणांमध्ये बँक यांचेमार्फत लोकअदालती दिवशी एकुण रक्कम रुपये 9 लाख 59 हजार 500 रूपये इतकी रक्कम वसुल करण्यात आली. त्याचप्रमाणे लोकअदालतीच्या अनुषंगाने नगर परिषद कळंब यांचे वतीने एकुण 20 प्रकरणांमध्ये रक्कम रुपये 4 लाख 63 हजार 859 रूपये इतकी रक्कम नगर परिषद स्तरावर वसुल करण्यात आली. कळंब तालुक्यातील ग्रामपंचायतीच्या एकुण 775 दाखलपूर्व (प्री-लिटीगेशन) प्रकरणांमध्ये संबंधित ग्रामपंचायतीमार्फत ग्रामपंचायत स्तरावर एकुण रक्कम रुपये 9 लाख 03 हजार 388 रूपये इतकी रक्कम लोकअदालतीच्या माध्यमातून वसुल करण्यात आली आहे. राष्ट्रीय लोकअदालत सुरळीतपणे पार पाडण्यासाठी विधीज्ञ मंडळातील सर्व विधीज्ञ, न्यायालयीन कर्मचारी तसेच पोलिस प्रशासन यांनी परिश्रम घेतले.