कोराेना आजाराला प्रतिबंध घालू पाहणारी लस अखेर बुधवारी (दि.१३) रात्री ८.२५ वाजेच्या सुमारास जिल्हा परिषदेत पोहोचली. पहिल्या टप्प्यात आरोग्य क्षेत्रातील कर्मचाऱ्यांना शनिवारपासून(दि.१६) लसीकरण केले जाणार आहे. जिल्ह्यात आरोग्य क्षेत्रात ८ हजार २७२ कर्मचारी असून, त्यासाठी १० हजार ५० लस उपलब्ध झाल्या आहेत. विशेष म्हणजे एका व्यक्तीस २ डोस ४ आवडयाच्या आंतराच्या अंतराने देणे आवश्यक असल्यामुळे साडेसहा सहजार डोसची कमरता निर्माण होण्याची शक्यता आहे.
दरम्यान, लस घेऊन आलेल्या वाहनाचे जिल्हा परिषदेच्या आवारात बुधवारी सायंकाळी स्वागत करण्यात आले. जिल्ह्यासाठी कोविड लस बुधवारी रात्री ८.२५ वाजता जिल्हा परिषदेत दाखल झाली असून जिल्हा शल्यचिकित्सक डॉ. डी. के. पाटील, जिल्हा आरोग्य अधिकारी डॉ. एच. व्ही. वडगावे, डॉ. कुलदिप मिटकरी, लसीकरण विभागातील औषध निर्माण अधिकारी डी. सी. धोतरे, शित साकळी तंत्रज्ञ व्ही. के. शेळगावकर, आरोग्य कर्मचारी शरद मुंडे आदी कर्मचाऱ्यांनी लसी घेऊन आलेल्या वाहनाचे स्वागत केले. उपलब्ध लस देण्याच्या मोहिमेचा शुभारंभ १६ जानेवारी २०२१ रोजी केला जाणार आहे.
पहिल्या टप्प्यात आरोग्य कर्मचाऱ्यांना कोविड लस दिली जाणार आहे. जिल्ह्यात एकूण चार ठिकाणी कोविड लस दिली जाणार आहे. जिल्हा रुग्णालयात उस्मानाबाद, कळंब, तुळजापूर, उमरगा उप जिल्हा रुग्णालयात लस देण्यात येणार आहे. या लसीकरण मोहिमेसाठी पोर्टलवर ८ हजार २७२ आरोग्य कर्मचाऱ्यांची माहिती अपलोड करण्यात आली आहे. जिल्ह्यात पहिल्या टप्प्यात लसीकरणासाठी १० हजार ५० डोसेस जिल्हास्तरावर प्राप्त झालेले आहेत. प्रत्येक सत्राच्या ठिकाणी प्रति दिन १०० आरोग्य कर्मचाऱ्यांना डोसे दिले जाणार आहेत. विशेष म्हणजे ज्या कर्मचाऱ्यांना या लसीचा पहिला डोस दिला जाईल त्याच कर्मचाऱ्यांना चार आठवडयानंतर दुसरा डोस दयावा लागणार आहे. त्यामुळे सध्या जिल्हयात साडेसहा हजार डोसची कमतरता आहे.
लवकर येणार कोविड लस
एका कर्मचाऱ्यांला कोविड लसीची चार आठवड्याच्या अंतराने दोन डोस दयावे लागतात.त्यामुळे आपल्याला १६ हजार ५०० लसीची आवश्यकता आहे.सध्या १० हजार ५० लस उपलब्ध झाल्या आहेत. उर्वरित पुरवठा लवकर होईल, अशी माहिती जिला आरोग्य अधिकारी हनंमत वडगावे यांनी दिली.