जिल्ह्यात पोलिसांच्या माध्यमातून अपघाताच्या ठिकाणांचा अभ्यास करून वेळ, वार, वाहनांचा प्रकार आणि कारणांचा विचार करून ब्लॅकस्पॉट ठरविण्यात आले. त्यामुळे गतवर्षाच्या तुलनेत २१ टक्क्यांनी अपघात घटल्याचे निरीक्षण जिल्हा पोलिस दलाने नोंदविले आहे. दरम्यान, यामुळे ५ टक्के मृत्यूही कमी झाले.
पोलिस विभागाने सांगितले की, गेल्या पाच वर्षात ज्या ठिकाणी अपघात झाले, अशा ठिकाणांचा पोलिस विभागाने अभ्यास केला. मृत्यूचे प्रमाण, गंभीर जखमी होण्याचे प्रमाण तसेच अपघाताचे कारण, वार तसेच वेळ याचाही अभ्यास करून पोलिस विभागाने जिल्ह्यात ब्लॅकस्पॉट निश्चित केले आहेत. अशा ठिकाणी महामार्ग सुरक्षा पथकामार्फत साइनबोर्ड लावण्यात आले आहेत. तसेच पांढरे पट्टे मारून वाहनधारकांना वेगावर नियंत्रण करता येईल, अशी व्यवस्था करण्यात आली. त्याचा सकारात्मक परिणाम दिसून आला. गेल्या वर्षीच्या तुलनेत अपघाताचे प्रमाण २१ टक्क्यांनी घटले असून, त्यामुळे मृत्यूही ५ टक्क्यांनी घटले आहेत.
जिल्ह्यात गेल्या काही वर्षाच्या तुलनेत यावर्षी घरफोड्या, चोऱ्या, दरोड्यांच्या घटनेत यावर्षी घट झाली आहे. पोलिस अधीक्षक राजतिलक रोशन यांच्या नावीन्यपूर्ण योजनेनुसार गुन्हेगारी पार्श्वभूमी असलेल्या लोकांवर पोलिसांनी साध्या वेशात पाळत ठेवली. तसेच पोलिस मित्र, ग्रामसुरक्षा दल या संकल्पनांचा परिपूर्ण उपयोग केला. पोलिस दलाले जनसंपर्कावरही भर दिला. तसेच रात्रगस्त प्रभावीपणे राबवून वारंवार घटना घडणाऱ्या भागात साध्या वेशात पाळत ठेवण्याचा प्रयत्न केला. त्यामुळे गुन्हेगारांच्या हालचालींवर लक्ष ठेवणे शक्य झाले.
जिल्ह्यात पोलिसांनी गुन्हेगारांच्या कार्यपद्धतीचा आढावा घेऊन गुन्ह्यांवर नियंत्रण ठेवण्यासोबतच कोर्टात आरोपींना शिक्षा व्हावी, यासाठी प्रयत्न केले. कोर्टात नेमलेले पैरवी अधिकारी प्रत्येक पोलिस ठाण्यातून नेमलेल्या कर्मचाऱ्यांच्या मदतीने साक्षीदारांना मुदतीत न्यायालयात हजार करून तपासकामी लागणाऱ्या अद्ययावत साहित्यासह प्रयत्न करत आहेत. गुन्हा दाखल झाल्यानंतर शास्त्रोक्त पद्धतीने तपास करण्यात येत आहे. तसेच गुन्हेगारांना शिक्षा होण्यासाठी सबळ पुरावे उपलब्ध होत आहेत.
१३० अल्पवयीन मुलींचा शोध
समाजात बेपत्ता होण्याचे प्रमाण वाढत असल्याने पोलिस विभागाने पोलिस अधीक्षक रोशन यांच्या पालघर पॅटर्नच्या धर्तीवर sop तयार करून अनेक बेपत्ता मुले-मुली तसेच नागरिकांना शोधून काढले. याची केंद्र शासनानेही दखल घेतली आहे. जिल्ह्यातील बेपत्ता व्यक्तींना शोधून काढण्यासाठी उपविभागीय पोलिस अधिकारी मोतीचंद राठोड यांच्या नेतृत्वाखाली जिल्ह्यातील प्रत्येक पोलिस ठाण्यातील एक अंमलदाराचे एक पथक तयार करण्यात आले आहे. या पथकाला प्रशिक्षण देण्यात आले. या टीमने गेल्या १० वर्षातील सुमारे ९०७ व्यक्ती शेाधून काढले. यामध्ये गेल्या ५ वर्षात अपहरणाच्या प्रकरणात बेपत्ता झालेले १३० मुले-मुली शोधून काढण्यात पथकाला यश आले.विशेष म्हणजे ही कामगिरी गेल्या वर्षभरातील आहे. पोलिस दलाच्या एकूणच उत्तम कामगिरीबद्दल कौतुक होत आहे.