उस्मानाबाद - प्रतिनिधी
गेल्या अनेक वर्षांपासून प्रतिक्षा असलेले वैद्यकीय महाविद्यालय उस्मानाबाद येथे साकार होण्याचा मार्ग मोकळा झाला आहे. शंभर विद्यार्थी क्षमता असलेल्या या महाविद्यालयाला राज्य मंत्रिमंडळाने मंजुरी दिल्यामुळे जिल्ह्यात आनंदाचे वातावरण निर्माण झाले आहे. गेल्या अनेक वर्षांपासून होत असलेली रुग्णांची ससेहोलपट आता थांबण्याची अपेक्षा व्यक्त केली जात आहे.
वैद्यकीय महाविद्यालय मंजुरीचे गुराळ गेल्या अनेक वर्षांपासून सुरू होते. तत्कालिन मुख्यमंत्री देवेंद्र फडणीस यांच्या मंत्रिमंडळातील वैद्यकीय शिक्षण मंत्री महाजन यांनी दोन वेळा घोषणा करूनही प्रत्यक्ष मूर्त स्वरूप येत नव्हते. यानंतर सातत्याने जिल्ह्यातील खासदार व सर्व आमदारांनी पाठपुरावा केला. आमदार कैलास पाटील यांनी सध्याचे वैद्यकीय शिक्षण मंत्री अमित देशमुख व अन्य मंत्र्यांसोबत बैठका घेऊन या संदर्भात पाठपुरावा केला होता. यामुळे वैद्यकीय महाविद्यालयाला उशिरा का होईना मंजुरी मिळाली आहे. जिल्हा रुग्णालयात वैद्यकीय महाविद्यालयाच्या अनुषंगाने सर्व सोयीसुविधा उपलब्ध करण्याचा प्रयत्न करण्यात आला आहे. यासाठी नवीन इमारत उभी केली असून जिल्हा परिषदेकडून जमीनही हस्तांतरित करण्यात आले आहे. यामुळे वैद्यकीय महाविद्यालय मंजूर होऊन कार्यान्वित होण्यासाठी अनुकूल वातावरण असून प्रत्यक्ष याच्या सुरुवातीसाठी प्रयत्न करणे आवश्यक आहे. वैद्यकीय महाविद्यालय नसल्यामुळे येथील जिल्हा रुग्णालयात आरोग्यविषयक सोयीसुविधा उपलब्ध नव्हत्या. परिणामी जिल्ह्यातील सर्व रुग्णांची आरोग्यविषयक हेळसांड सुरू होती. जिल्हा रुग्णालयात गेल्यानंतर सर्वच रुग्णांना गंभीर स्वरुपाचे आजार आढळल्यास सोलापूर किंवा लातूरला पाठवण्यात येत होते. आता अशा पद्धतीने होणारी ससेहोलपट थांबणार असून उच्च दर्जाचे उपचार उस्मानाबाद येथेच रुग्णांना मिळणार असल्यामुळे सर्वत्र आनंद व्यक्त केला जात आहे.
फटाके फोडून जल्लोष
उस्मानाबादला शासकीय वैद्यकीय महाविद्यालये बाबतीत आजच्या मंत्रीमंडळाच्या बैठकीत निर्णय होऊन शिक्कामोर्तब झाल्याची वार्ता येताच फटाके फोडून आनंद व्यक्त करण्यात आला. यावेळी खासदार ओम राजे निंबाळकर, आमदार कैलास पाटील, नगराध्यक्ष मकरंद राजे निंबाळकर,संजय पाटील दुधगांवकर, प्रविण कोकाटे, भिमा जाधव, मसुद शेख, उमेश राजेनिंबाळकर,पप्पू मुंडे यांच्यासह महाविकास आघाडीतील प्रमुख नेते कार्यकर्ते, नागरिक उपस्थित होते.