उस्मानाबाद / प्रतिनीधी -
शहरातील सांजा चौकातून जाणाऱ्या धुळे-सोलापूर या राष्ट्रीय महामार्गावरील उड्डाणपूल वर्षभरातच कमकुवत झाला होता. त्यातच चार महिन्यांपासून पूल जैसे थे ठेवत वाहतूक सर्विस रोडवरून वळवली होती. यामुळे होणारी गैरसोय व वाहतुकीची कोंडी वाढली होती. याची दखल घेत अखेर दोन दिवसांपूर्वी या पुलाच्या कामाला प्रारंभ झाला असून, पुलावरील स्लॅब नव्याने टाकण्यात येणार असल्याचे सांगण्यात आले.
उस्मानाबाद जवळून जाणाऱ्या धुळे-सोलापूर राष्ट्रीय महामार्गामुळे बाहेरील वाहनधारकांची सोय झाली तरी सर्व्हिस रोड तयार नसणे, आवश्यक त्या ठिकाणी अंडरपास रस्ता न सोडणे, लाइटची व्यवस्था नसल्यामुळे उस्मानाबादकरांची गैरसोय झाली आहे. दि.२२ आॅगस्ट रोजी सांजा चौकातील उड्डाणपुलाचे ढपले पडले. पडताळणीत पुलावरील स्लॅब गुणवत्तापूर्ण नसल्याचेच समोर आल्याने तब्बल चार महिन्यांपासून पुलावरील वाहतूक बंद करून सर्विस रोडने वाहने सोडली होती. यामुळे सांजा चौकात कायम वाहतुकीची कोंडी होत होती. वाहतूक कोंडीमुळे त्रस्त नागरिक पुलाचे काम केव्हा होणार असा संतप्त प्रश्न सातत्याने विचारत होते. यासंदर्भात शिवसेना, मनसे, भाजपने आंदोलनही केले होते. अखेर या सर्व परिस्थितीची दखल घेऊन महामार्ग प्रकल्प व कंत्राटदार कंपनीने पुलावरील स्लॅब नव्यानेच टाकण्याचा निर्णय घेतला.