पंधरा जण एकत्र येवून दोघांना काठी व कुऱ्हाडीने जीवे मारण्याच्या हेतूने मारहाण केल्याने एकाचा जागेत मृत्यू झाला तर एक जण गंभीर जखमी झाल्याने १५ जणांविरुद्ध गुन्हा दाखल करण्यात आला आहे. या प्रकरणातील एकही आरोपीला अटक करण्यात पोलिसांना यश मिळाले नसुन सोमवारी पोलीस अधिक्षक राजतीलक रोशन यांनी थोरलेवाडी येथे भेट देऊन पाहणी केली व गावकऱ्यांशी संवाद साधून शांततेचे आवाहन केले.
उमरगा तालुक्यातील थोरलीवाडी येथे रविवारी ( दि.१०) सकाळी दहा वाजण्याचे सुमारास जुन्या भांडणाची कुरापत काढून पंधरा-वीस जणांनी दोघा जणांना कुऱ्हाड, काठीने जबर मारहाण केली होती यात हणमंत अर्जुन परसराम व गोविंद गोपाळ कोराळे हे गंभीर जखमी झाले होते. पोलिसांना घटनेची माहिती मिळताच घटनास्थळी जाऊन दोन्ही जखमींना उमरगा येथील उपजिल्हा रुग्णालयात दाखल केले असता हणमंत परसराम हा मयत झाल्याचे झाला तर गोविंद कोराळे याला पुढील उपचारासाठी शहरातील खाजगी रुग्णालयात दाखल करण्यात आले होते. या प्रकरणी बालाजी गुंडाप्पा मिसाले यांनी दिलेल्या फिर्यादीवरून पोलिसांत पंधरा जणांविरुद्ध खुनाचा गुन्हा दाखल करण्यात आला होता. या प्रकरणातील आरोपींना पकडण्यासाठी पोलीस निरीक्षक मुकुंद आघाव व पोलीस उपनिरीक्षक अमोल मालूसुरे यांच्या नेतृत्वाखाली दोन पथक तयार करण्यात आले असून सोमवारी रात्री उशिरापर्यंत एकही आरोपी पोलिसांच्या हाती लागला नाही. दरम्यान सोमवारी दि. ११ रोजी पोलीस अधीक्षक राजतीलक रोशन यांनी थोरलेवाडीला भेट देऊन माहिती घेतली व पोलिसांना दिशानिर्देश दिले. यावेळी ग्रामस्थांशी सवांद साधून शांततेचे आवाहन केले. यावेळी उपविभागीय पोलीस अधिकारी अनुराधा उदमले व निरीक्षक मुकुंद आघाव आदीसह पोलिस अधिकारी कर्मचारी व ग्रामस्थ उपस्थित होते.