सत्याचा शोध घेण्याची आकांक्षा असणारा प्रत्येक व्यक्ती पत्रकार असतो असे प्रतिपादन लोकसत्ताचे पत्रकार,कवी रवी केसकर यांनी रा.गे.शिंदे महाविद्यालयाने आयोजित केलेल्या एकदिवसीय वेबसंवादात केले.
परंडा येथील शिक्षण महर्षी गुरुवर्य रा.गे.शिंदे महाविद्यालयातील ब्रॉडकास्टिंग अँड जर्न्यालिजम विभागामार्फत बुधवार दि.१३ रोजी “पत्रकार आणि सामाजिक बांधिलकी” या विषयावर एकदिवसीय वेबसंवाद आयोजित करण्यात आला होता.
या वेबसंवादात प्रमुख पाहुणे म्हणून लोकसत्ता आणि संचार या वर्तमानपत्राचे पत्रकार रवी केसकर आणि न्यूज १८ लोकमत या वृत्तवाहिनीच्या वृत्तनिवेदीका स्वाती गोडसे यांनी ऑनलाइन मार्गदर्शन केले. या कार्यक्रमाच्या अध्यक्षस्थानी महाविद्यालयाच्या प्राचार्या डॉ.दीपा सावळे या होत्या.कार्यक्रमाच्या सुरुवातीला विभागाचे प्राध्यापक सज्जन यादव यांनी प्रास्ताविक करून प्रमुख पाहुण्यांची ओळख करून दिली. सुरुवातीला रवी केसकर यांनी मार्गदर्शन करताना पत्रकारांच्या सामाजिक बांधिलकीबद्दल विस्तृत विवेचन केले. डॉ.बाबासाहेब आंबेडकर, महात्मा फुले, आगरकर यांच्या पत्रकारितेचे दाखले देऊन केसकर यांनी, लेखणीचे पंख लावून सत्याच्या शोधात स्वार होणार पत्रकारचं प्रबोधनाचे कार्य करू शकतो असे प्रतिपादन केले. मुंबईच्या स्वाती गोडसे यांनी वृत्तनिवेदन करत असताना आणि प्रेक्षकांशी संवाद साधताना पत्रकारांनी कसे असायला हवे याबद्दल मार्गदर्शन केले. पत्रकारितेतील नवीन मुलांनी माहितीची मशाल घेऊन समाजाला प्रबोधनाची आणि सत्याची वाट दाखवावी अशी अपेक्षा व्यक्त केली. कोरोना सारख्या महाभयंकर साथीत इलेक्ट्रॉनिक मीडियातील पत्रकारांसमोर नेमकी कशा प्रकारची आव्हाने होती याबद्दल सांगितले. बलात्कारासारख्या गंभीर घटनेचे वार्तांकन करताना पत्रकारांच्या शब्दाला किती महत्व असते याबद्दल त्यांनी विद्यार्थ्यांना मार्गदर्शन केले.
अध्यक्षीय समारोप करताना महाविद्यालयाच्या प्राचार्या डॉ.दीपा सावळे यांनी भारतातील पत्रकारितेच्या वाटचालीवर प्रकाश टाकला. समाज प्रबोधनाची वाट पत्रकारांशिवाय अशक्य आहे त्यामुळे पत्रकारांचा आणि त्यांच्या कामाचा प्रत्येकाने आदर करायला हवा असे डॉ.सावळे यांनी सांगितले.या वेब संवादाचे सूत्रसंचालन सांस्कृतिक विभागाचे विभागप्रमुख डॉ.शहाजी चंदनशिवे यांनी केले.कार्यक्रम यशस्वी करण्यासाठी डॉ.महेशकुमार माने,डॉ.अक्षय घुमरे, प्रा.संतोष काळे, ग्रंथपाल डॉ. राहुल देशमुख यांनी सहकार्य केले.या वेबसंवादात महाविद्यालयातील पत्रकारितेच्या विद्यार्थ्यांसोबतच परंड्यातील पत्रकार, सामाजिक-शैक्षणिक व राजकीय क्षेत्रातील लोकांनी मोठ्या प्रमाणावर सहभाग नोंदवला होता.